Me ricordo....
Quan che ero putelota
me piaseva nar lontan
a trovar me zii en campagna
via nel Friuli, fin Avian.
Ne la casa de campagna
ghera bestie de ogni sort,
ghera vache e asenei
oche, anedre , polastrei.
Mi pasevo le zornae
a sfogar la matarela
fevo corse drio ai polastri
e ngiardin fevo disastri.
Me piaseva star en cosina
ndo me zia léra regina,
e a cucar dent le padele
me vegniva l´acquolina.
Me piaseva quan me zio
el menava el car col bo´,
mi saltevo su de drio
e corevo en su en zo´.
Me cusini, tutti masci,
coi da forca da no dir,
i so zoghi i era duri,
ei me feva tribular.
Dopo zena tut de colp
deventevo brava e cheta
no volevo che i penses
che dovevo nar nel let.
Ferma su na caregota
quan che tutti i era nai
aspetevo che me zia
la finis el so via vai.
Quan che po´la se meteva
el scial nero su le spale
me pareva gnanca vera
de nar for en vers le stale.
Dopo en par de passi al strof,
con me zia arent ben streta,
ariveven a la stala
per polsar su na bancheta.
Me n`cantevo a vardar su
el slusor de na luzeta
che pendeva zo da n´ traf
tuta en mez a ragnatele
da parer en sol n´nebiá.
E n´sta luce fioca fioca
ghera n´aria de mistero
che se ero en po nsognada
tut de colp la me sveiava.
Ghera zent de la contrada
tutti lí sentadi zo
done. omeni e putei
a ciacerar, a far filó.
Uno el se fumeva la pipa
naltro en toc de sigaret
i parleva i rideva
e le vache le vardeva.
Le vedevo li a do passi
asfiar e a ruminar
coi so oci lagrimosi
ma i pareva anca curiosi.
El rumor de quan le asfieva
el me feva ntimorir
el vapor dai so nasoni
me pareva do vulcani.
mi tachevo a imaginar
gnomi e fate a non finir
mostri che spueva foc
e me feva inorridir.
Fra el caldin e la luzeta
li vizin a la me zia
encantada da le ombre
che vegniva e neva via,
Mi me ndromenzevo cheta
Li sentaa su la bacheta.
°°°°°
Graziella Torboli
2001
Nessun commento:
Posta un commento